Óttast að hátíðin sé að hverfa

Biskup Ísland óttast að hátíðin sé að hverfa úr lífi fólks og að allir dagar verði eins. Sjálfur var hann við hvítasunnumessu í Hallgrímskirkju í dag til að halda upp á anda hins góða og bjarta. Nokkur fjöldi var við hvítasunnumessu í Hallgrímskirkju í dag. Meðal gesta voru herra Karl Sigurbjörnsson biskup Íslands og faðir hans, Sigurbjörn Einarsson biskup. Mótettukór Hallgrímskirkju söng við guðþjónustuna. Hvítasunnan er ein þriggja stórhátíða kirkjunnar þó minna fari fyrir henni en hinum tveimur. Hún er afmælishátíð kirkjunnar, en á hvítasunnunni varð kirkjan til sem hreyfing. Það var þá sem andinn kom og blés burtu ótta og sorg lærisveinanna eftir fráhvarf Jesú Krists. Þeir skildu allt um Jesú og gátu talað um það þannig að aðrir skildu. En hvað þýðingu hefur hvítasunnan fyrir kirkjuna? Karl Sigurbjörnsson, biskup Íslands segist einu sinni hafa spurt krakka hvers vegna hátíðir væru haldnar og þá hafi einn svarað: „Til að halda upp á eitthvað.“ Hvítasunnan haldi upp á anda hins góða og bjarta og fagra, anda skilnings milli fólks og anda kærleikans. Það hafi mikla þýðingu, ekki bara fyrir kirkjuna heldur allan heiminn, að þetta tilefni komist að. Hefur biskupinn áhyggjur af því hátíðin gleymist hjá almenningi sem oft notar hvítasunnuna sem fyrstu ferðahelgi sumarsins? Karl segir dásamlegt að fólk fái frí og lyfti sér upp og ferðist um landið en hann neiti því ekki að hann hafi vissar áhyggjur af þeirri tilhneigingu að allir dagar séu eins og hátíðinni sé útrýmt úr lífinu. Standa þurfi vörð um hátíðina og helgidaginn vegna þess að það greiði veg góðum gildum. Þess er rétt að minnast að árlegir vortónleikar Mótettukórsins verða í Hallgrímskirkju klukkan fimm á morgun.