Enn tapar Samfylking fylgi

Samfylkingin þarf að þétta raðirnar til að bæta úr stöðu sinni. Þetta segir formaður flokksins en fylgi hans mælist nú rétt um 26% sem er það lægsta á þessu kjörtímabili. Flokkurinn hefur misst átta prósentustiga fylgi frá því Ingibjörg Sólrún tók við. Hún hafnar því að óeining ríki innan þingflokksins en segir forystuna verða að taka á sig tap, eins og fylgisaukningu.

Samkvæmt nýrri skoðanakönnun Gallups mælist nú fylgi Samfylkingar 26%. Það er lægsta fylgi flokksins á þessu kjörtímabili. Ingibjörg segir það vissulega vera áhyggjuefni að fylgi flokksins skuli vera komið eins langt niður og raun beri vitni. "Þetta væri vissulega slæmt ef um væri að ræða kosningaúrslit og því er ljóst að við verðum þétta raðirnar," segir Ingibjörg. "Ég er þó viss um að þær breytingar sem nú eiga sér stað í innra starfi flokksins eigi eftir að skila sér þegar fram í sækir."

Flokkurinn hefur nú tapað fylgi í hverri skoðanakannakönnuninni á eftir annarri frá því Ingibjörg tók við formennsku. En tapið nemur um átta prósentustigum. Er það ekki áhyggjuefni að mati Ingibjargar?

"Auðvitað er aldrei hægt að tala um flokk án þess að forystan sé þar líka. Ég vill þó benda á að um það leyti sem við héldum landsfund að þá var mikil uppsveifla í fylgi flokksins í könnunum, uppsveifla sem ég tel mig nú eiga eitthvað í líka," segir hún.

- En er ekki að sama skapi hægt að rekja tap á fylgi í könnunum síðustu mánuðina til þín?

"Jú, eins og ég sagði, þá er forysta og flokkur auðvitað sami hluturinn og því verðum við í forystunni að taka þetta til okkar og skoða málin," segir Ingibjörg.

Sögusagnir hafa verið á kreiki um að vaxandi óeiningar gæti innan þingflokksins með störf Ingibjargar og að jafnvel hafi komið upp alvarlegir brestir í samstarf hennar og Margrétar Frímannsdóttur, þingflokksformanns. Margrét neitar þessu raunar sjálf en þingmenn flokksins sem NFS hefur rætt við segja samstarf þeirra hafa verið erfitt.

-Er það málið?

Ekki segir Ingibjörg. "Nei ég kannast ekki við það. Vissulega urðum við fyrir mikilli blóðtöku þegar Guðmundur Árni og Bryndís Hlöðversdóttir yfirgáfu þingflokkinn en það koma menn í manns stað. En að uppi sé einhver ágreiningur, nei ég kannast ekki við það."