Bændur mega áfram marka fé

Ekki verður hætt að marka fé þrátt fyrir gildistöku nýrrar reglugerðar um búfjármerkingar, en hún gerir ráð fyrir því að sauðfjárbændur og kúabændur merki gripi sína með nýjum plastmerkjum. Sauðfjárbóndi sem blaðið hafði tal af óttaðist að með nýjum merkjum myndi þúsund ára hefð um mörkun fjár leggjast af. "Menn halda áfram að marka sitt fé eins og venjulega. Reglugerðin kveður ekki á um neinar breytingar á því," segir Halldór Runólfsson yfirdýralæknir og telur ágætar viðbótarupplýsingar felast í eyrnamarki. Nýju plastmerkin eru í samræmi við Evrópureglur, meðal annars til að rekja megi uppruna sláturafurða og vegna sjúkdómavarna. "Svo er líka verið að koma upp gagnagrunni, en í þessu felst kennitala hverrar einustu skepnu því reglugerðin nær líka yfir svín, alifugla og hesta." Halldór segir þó mismunandi eftir tegundum hvernig skepnur eru merktar, en bæði kýr og kindur fá plastmerki.