Mikill áhugi fyrir samtökum

Fjölmargir hafa skráð sig sem stofnfélaga í samtök sem berjast fyrir því að fá miðstöð innanlandsflugs til Keflavíkurflugvallar samhliða samgöngutengingu milli Straumsvíkur og Vatnsmýrarinnar í Reykjavík. Víkurfréttir segja frá því að það kosti 1500 krónur að skrá sig á skráningarsíðu samtakanna og hefur komið fram gagnrýni á gjaldtökuna. Nota á peningana upp í kostnað við verkfræðilega úttekt á hugsanlegu vegarstæði milli Straumsvíkur og Vatnsmýrarinnar. Einnig er ljóst að ýmsa aðra þætti þarf að skoða sérstaklega eins og sjúkraflug og varaflugvallarmál. Því var ákveðið að bjóða öllum sem vilja berjast fyrir þessu málefni tækifæri til að gerast sérstakir stofnfélagar og greiða fyrir það 1.500 krónur. Hugmyndin er að eftir stofnfund, sem verður haldinn á Ránni 6. október, verði öllum boðið að skrá sig í samtökin án þess að greiða gjaldið. Til að fjármagna úttektina verður leitað eftir fjárframlögum frá fyrirtækum og stofnunum á Suðurnesjum.