Harðnandi kosningaslagur

Jens Stoltenberg, formaður norska Verkamannaflokksins, hitti tvo helstu leiðtoga samtaka launafólks á ráðstefnu um velferð og valfrelsi í gær, en flokkurinn talar fyrir uppstokkun í opinberum rekstri. "Það stendur sem samþykkt var á landsfundi Verkamannaflokksins að við, sem hlynnt erum opinberum umsvifum og þjónustu, viljum jafnframt stokka upp. Hægrimenn tala aðeins fyrir einkavæðingu. Endurnýjun er okkar markmið. Það kemur meðal annars fram í áformum okkar um endurskoðun tryggingabóta sem ætlað er að fækka fólki á framfærslu hins opinbera en fjölga fólki á vinnumarkaði," segir Stoltenberg. Hann kveðst andvígur einkavæðingu innan heilbrigðis- og skólakerfisins og í umönnunarþjónustu. "Ég held mig við það sem ég hef áður sagt að markaðslausnir gilda ekki á þessum sviðum." Frjálslyndi flokkurinn Venstre, sem stutt hefur hægristjórn Bondeviks, telur koma til greina að þrengja verkfallsréttinn og koma þannig í veg fyrir langvinn verkföll sem hafi haft víðtæk neikvæð áhrif á norskt efnahagslíf síðustu misserin. Gerd-Liv Valla, forseti norska Alþýðusambandsins, segir að launamunur aukist og réttindi launamanna verði skert nái hægriflokkarnir völdum á nýjan leik. Kjell Magne Bondevik, forsætisráðherra og formaður Kristilega þjóðarflokksins, heitir auknum stuðningi við þá efnaminnstu. Hann vill bæta hag öryrkja, gera reglur um vinnutíma sveigjanlegri og skapa þeim aukin tækifæri til að bæta fjárhagslegt öryggi sitt umfram þann beina stuðning sem kemur frá hinu opinbera. Verkalýðshreyfingin styður Verkamannaflokkinn í kosningabaráttunni en það er hægriflokkunum mikill þyrnir í augum. Stuðningur samtaka launafólks við Verkamannaflokkinn og "rauðgrænt" bandalag hans við Sósíalíska vinstriflokkinn og Miðflokkinn hefur skerpt hugmyndafræðileg átök í kosningabaráttunni í Noregi. Fréttaskýrendur telja jafnvel að þetta geti stuðlað að nánari samvinnu hægriflokkanna á nýjan leik þótt varla fari þeir í eina sæng fyrir þingkosningarnar 12. september næstkomandi.