Van Exel semur við Spurs

Leikstjórnandinn Nick Van Exel, sem leikið hefur með Portland Trailblazers í NBA deildinni í körfubolta, hefur gert samning við meistara San Antonio Spurs um að leika með liðinu næsta vetur. Van Exel hefur leikið með nokkrum liðum í deildinni síðan hann kom inn í hana árið 1993 og íhugaði að leggja skóna á hilluna í fyrra, en hefur nú ákveðið að ganga til liðs við meistarana. Van Exel hefur skorað næst flestar þriggja stiga körfur allra leikmanna sem nú spila í deildinni eða 1473. Hann skoraði 11 stig að meðaltali í leik í fyrrra með Portland og gaf 4,3 stoðsendingar. Fyrirfram verður áhugavert að sjá hvernig Van Exel smellur inn í hið agaða lið San Antonio, því hann hefur orð á sér fyrir að líta nokkuð stórt á sig og á oft erfitt með að hemja sig í skotgleðinni. Engum dyljast þó hæfileikar hans og á hann eflaust eftir að styrkja lið San Antonio mikið ef vel til tekst hjá honum.