Ólafur Jóhannesson kátur

Ólafur Jóhannesson, þjálfari nýkrýndra Íslandsmeistara FH var sigurreifur eftir sigur FH á Val í Kaplakrika í gær og þessi annars hægláti maður dansaði og trallaði með stuðningsmönnum liðsins þegar ljóst var að titillinn væri í höfn, annað árið í röð. Aðspurður sagðist Ólafur alls ekki hafa búist við að gengi liðsins yrði með þvílíkum ólíkindum og raun ber vitni. "Ég bjóst hreint ekki við því að árangur liðsins yrði þetta góður og þetta er búið að vera ótrúlegt sumar. Ég vissi auðvitað að við værum með mjög gott lið, en maður hefur oft áður séð góð lið í þessu móti, sem hafa svo klúðrað því. Við vissum bara okkar takmörk held ég," sagði Ólafur sem sagði árangur liðsins felast í sterkum hóp og sterkri liðsheild. "Það er kannski erfitt að finna eina skýringu á því af hverju þetta lið hefur ekki tapað stigi í deildinni í allt sumar. Ég held að fyrst og fremst sé það nú bara af því að allir sem koma nálægt liðinu eru að vinna vinnuna sína, hópurinn er sterkur og svo eigum við auðvitað frábæra stuðningsmenn sem hjálpa okkur mikið. Það hefur bara allt gengið upp hjá okkur í sumar," sagði Ólafur, sem segist ekki óttast að verði spennufall hjá liðinu í kjölfar hátíðarhaldanna í Kaplakrika, en þar var lifandi tónlist og mikið fjör þegar blaðamaður dró hann út úr þvögunni.  "Nei, ég hef engar áhyggjur af slíku, enda höfum við tekið einn leik fyrir í einu í allt sumar og það er kannski líka þessvegna sem vel hefur gengið hjá okkur. Við eigum ennþá möguleika á að vinna alla leiki okkar í sumar og munum fara inn í hvern leik með það fyrir augum að vinna hann eins og við höfum gert," sagði þjálfarinn glottandi, þar sem hann stóð við hlið Hafnafjarðarmafíunnar sem söng; "Ég fíla FH" fullum hálsi.