Deilt um breytingar á leiðakerfi

Ágreiningur í stjórn Strætó bs. á fundi í gær varð til þess að Björk Vilhelmsdóttir stjórnarformaður dró til baka tvær tillögur sínar um breytingar á þjónustu strætisvagna. Meirihluti stjórnar telur að kostnaður við breytingar á þjónustutíma, leiðakerfi og tímatöflum verði of mikill. "Þarna var tekist á um hlutina," sagði Björk eftir fundinn. "Við vorum bæði að fara yfir reynsluna af nýja kerfinu, tillögur um lengdan þjónustutíma og breytingar á tímatöflum og leiðum. Ákveðið var að fela framkvæmdastjóra að breyta tímatöflunum eins og þyrfti og koma með tillögur að breytingum á leiðum." Áætlað er að lenging á aksturstíma Strætó á öllum leiðum til miðnættis kosti 40 milljónir króna á ári. Spurð nánar út í efni tillagnanna tveggja sem hún lagði fram, kvaðst Björk ekki getað greint frá því að svo stöddu þar sem hún hefði dregið þær til baka á fundinum. Ákveðið hefði verið að fresta ákvörðunum um viku, sem væri í sjálfu sér ásættanlegt. "En ég fell ekki frá því að ég tel að það eigi að breyta þjónustutímanum," ítrekar hún. Ármann Kr. Ólafsson stjórnarmaður í Strætó bs. segir, að stjórnin hafi viljað leyfa málinu "að anda aðeins," þannig að fyrst væri einu breytt, síðan öðru og svo koll af kolli með tilheyrandi kostnaði í hvert sinn. "Fyrir mitt leyti finnst mér að taka þurfi við öllum athugasemdum, fara yfir þær og gera síðan heildstæðar breytingar," segir hann. "Nú er til dæmis að koma inn stór hópur notenda sem er skólafólkið. Mér finnst ekkert sjálfgefið að við lengjum þjónustutímann til 12 á miðnætti. Við höfum úr ákveðnum fjármunum að spila. Spurningin er hvort breyting á einum lið kosti ekki endurskoðun á einhverju öðru." Ármann segir skyldur stjórnarinnar að fara vel yfir málið og gera síðan eina heildræna breytingu sem gagnist sem flestum.