Tvo leikskólakennara vantar

Fjöldi umsókna um störf á leikskólum Reykjavíkurborgar bárust Menntasviði borgarinnar í gær að sögn Gerðar G. Óskarsdóttur, sviðsstjóra Menntasviðs. Enn vantar þó tvo starfsmenn á hvern leikskóla í borginni að meðaltali, en samtals eru milli 140 og 150 störf laus að sögn Gerðar. Gerður telur þó viðbúið að grípa þurfi til aðgerða á einhverjum leikskólum í Grafarvogi, þar sem ástandið er verst. "Þessi staða hefur áður komið upp og þá hefur verið gripið til þess ráðs að ákveðinn hópur barna verði heima einn dag í senn," segir hún. Að sögn Gerðar hafa flestir leikskólar nógu marga starfsmenn fram til mánaðamóta og vonast hún til þess að fleiri umsóknir berist. Heimildir Fréttablaðsins herma að dæmi séu þó um leikskóla þar sem hefja verði aðgerðir vegna manneklu strax í næstu viku að óbreyttu. Að sögn Gerðar verður að öllum líkindum að ráða fleira ófaglært starfsfólk til leikskólanna. "Eins og staðan er í dag eru ekki líkur á því að menntaðir leikskólakennarar fáist í störfin," segir Gerður. Hugmyndum um að ráða til starfa eldri borgara hafi einnig verið velt upp. "Eftir því sem við komumst næst er vandamálið að aðstoðarfólkið og leiðbeinendurnir hætta störfum," segir Þröstur Brynjarsson, varaformaður Félags leikskólakennara. "Lítil hreyfing er hins vegar á faglærðum leikskólakennurunum." Þröstur segir áhyggjuefni hversu hátt hlutfall starfsmanna leikskóla sé ófaglærður, yfir sextíu prósent starfsmanna eins og staðan sé í dag. "Lögum samkvæmt eiga hins vegar allir þeir sem sjá um uppeldi og menntun barna í leikskólum að vera til þess menntaðir." Þröstur lýsir einnig áhyggjum sínum af því að Kennaraháskólinn hafi þurft að hafna hæfum umsækjendum um inntöku í leikskólakennaranám við skólann. Byrjunarlaun starfsmanna leikskóla eru mjög misjöfn eftir aldri, menntun og starfsreynslu viðkomandi að sögn Sigurlaugar Gröndal, hjá Eflingu - stéttarfélagi. Lægstu byrjunarlaun aðstoðarmanna nema tæplega 113 þúsund krónum á mánuði.