Ráðuneytum verður fækkað

"Við erum fyrst og fremst að vinna að því að gera stjórnsýsluna markvissari og meira í takt við tímann," segir Halldór Ásgrímsson forsætisráðherra. Á fundi ríkisstjórnarinnar í gær var samþykkt að fela Birni Bjarnasyni dómsmálaráðherra og Árna Magnússyni félagsmálaráðherra að leiða verkefni um endurskoðun á skipulagi stjórnsýslunnar. Verkefnið verður undir forystu forsætisráðuneytisins en Halldór Ásgrímsson viðraði upphaflega hugmyndir þessa efnis í hátíðarræðu sinni 17. júní síðastliðinn. "Það hafa orðið gífurlegar breytingar á okkar þjóðfélagi frá því að breytingar af þessu tagi voru gerðar síðast árið 1969 en reyndar hefur umhverfisráðuneytið verið stofnað síðan þá. Það hafa verið í gangi mjög margar hugmyndir um breytingar, þar á meðal að færa verkefni milli ráðuneyta, hugsanlega sameina einhver ráðuneyti og koma á starfi aðstoðarráðherra. Það er allavega orðið löngu tímabært að fara í vinnu af þessu tagi," segir Halldór. Árni Magnússon félagsmálaráðherra segist binda miklar vonir við þá vinnu sem er fram undan. "Við höfum lýst því yfir að það er tímabært að endurskipuleggja stjórnarráðið og hafa aðra og skýrari verkaskiptingu milli ráðuneyta með talsverðri fækkun þeirra líka. Ég held að það verði töluverð uppstokkun enda hefur lítil sem engin breyting orðið á þessu skipulagi frá árinu 1969," segir Árni. Hann segir of snemmt að segja til um hversu mikið ráðuneytum geti fækkað en búast megi við talsverðri fækkun. "Ég hef sjálfur sagt það að mér finnst að það sé hægt að fækka umtalsvert. En það verður að koma í ljós þegar vinnan er hafin," segir Árni. Ekki náðist í Björn Bjarnason dómsmálaráðherra.