Bjórneysla tvöfaldast á 12 árum

Íslendingar hafa stóraukið áfengisdrykkju sína og eru nú í þriðja sæti á eftir Dönum og Grænlendingum yfir þær norrænu þjóðir sem mest drekka. Léttvínsdrykkja Íslendinga hefur aukist um meira en helming á sex árum og bjórneysla meira en tvöfaldast frá árinu 1993. Íslendingar eru ekki lengur í neðsta sæti yfir drykkjurúta á Norðurlöndum samkvæmt samantekt sænsku Lýðheilsustöðvarinnar yfir þróun áfengismála á Norðurlöndunum á árunum 1993 til 2004. Norðmenn hrósa happi yfir að hafa náð af okkur neðsta sætinu með minnstu áfengisneyslu á hvern mann, en þetta er eitt af fáu skiptunum þar sem best er er að reka lestina. Rafn Jónsson, verkefnisstjóri áfengis- og vímuvarna hjá Lýðheilsustöð segir ýmislegt hafa komið á óvart í skýrslunni. Hann segir Íslendinga farna að drekka meira af áfengi en Norðmenn og Svíar, Íslendingar drekki að meðaltali 6,71 lítra á meðan Norðmenn drekki að meðaltali 6,22 og Svíar 6,50. Neysla sterks víns hefur verið á undanhaldi á Íslandi en Ísland er eina landið á Norðurlöndum þar neysla sterks víns hefur minnkað stöðugt. Aðspurður í hvaða áfengisflokkum neyslan hafi aukist segir Rafn að aukninguna sé fyrst og fremst að finna í bjór. Íslendingar drekki umtalsvert mikið magn af honum, eða 70 lítra hver einstaklingur 15 ára og eldri en Svíar hafi dregið úr sinni neyslu og séu komnir í 57 lítra. Bjórdrykkjan hefur aukist mest hjá ungu fólki á aldrinum 18 til 24 ára. Telur Rafn helstu ástæður fyrir því vera vel heppnaða markaðssetningu og lækkað vöruverð. Á síðustu sex árum hefur sala léttvíns á Íslandi aukist um 62 prósent en þrátt fyrir það drekka Íslendingar minnst af léttvíni af Norðurlandaþjóðunum, eða að meðaltali um 1,3 lítra á mann.