Ekkert styðji innflutningsbann

Formaður Dýralæknafélags Ísland segir landbúnaðarráðherra beita sjúkdómsvarnarákvæði þar sem það eigi ekki við. Hann segir ekkert styðja þá kenningu ráðherra að banna eigi innflutning á nautakjöti frá Argentínu. Þrátt fyrir að embætti yfirdýralæknis hafi lagt blessun sína yfir að hingað sé flutt inn nautakjöt frá Argentínu hefur landbúnaðarráðuneytið ekki gefið leyfi fyrir því. Ástæðan er sögð sjúkdómavarnir. Embætti yfirdýralæknis segir svæðið sem um ræðir vera í sunnanverðri Argentínu og það ávallt hafa verið laust við gin- og klaufaveiki. Það virðist því sem ráðuneytið fari eftir strangari stöðlum en það setur embætti yfirdýralæknis. Guðni Ágústsson landbúnaðarráðherra sagði samtali við fréttastofu Stöðvar 2 í dag að gin- og klaufaveiki hefði komið upp í Argentínu árið 2003. Hann sagði mikilvægt að velja góð lönd þegar kæmi að kjötinnflutningi og taka enga áhættu. Þegar hann var spurður að því hvers vegna kjöt frá þeim Evrópulöndum þar sem gin- og klaufaveikin kom upp á svipuðum tíma hefði verið leyft var svarið að innkaup á þessum vörum hefðu minnkað mikið. Þegar Guðni var spurður um hvort þetta væri liður í því að verja tekjur íslensku bændastéttarinnar svaraði Guðni að Ísland flytti inn kjöt frá öruggum löndum og tók sem dæmi Nýja-Sjáland og Danmörku. Halldór Runólfsson yfirdýralæknir segir ekki óeðlilegt að landbúnaðarráðuneytið fari ekki eftir mati yfirdýralæknis. Hann segir áhættumatsmuninn liggja í því að Evrópulöndin bólusetji dýrin ekki líkt og Argentína. Staðan sé betri ef bólusetningin sé sleppt. Þorvaldur H. Þórðarson, formaður, Dýralæknafélags Íslands, segir alrangt hjá ráðherra að beita þeim rökum sem hann gerir því þau standist einfaldlega ekki. Á meðan lögfræðingar íslenskra kjötinnflytjenda velta því fyrir sér hvort grundvöllur sé fyrir málshöfðun vegna suðurameríska kjötsins má geta þess að Færeyingar geta keypt kílóið af slíku kjöti á 400 íslenskar krónur