Framsókn vill lægri fjármagnsskatt

"Það er allt opið hvað varðar hækkun á fjármagnstekjuskatti en það þarf þó að taka tillit til þess að við missum ekki fjármagn úr landi," segir Magnús Stefánsson, formaður fjárlaganefndar og alþingismaður Framsóknarflokksins. Hjálmar Árnason, þingflokksformaður Framsóknarflokksins, lýsti þeirri skoðun sinni í Fréttablaðinu í gær að vel kæmi til greina að hækka fjármagnstekjuskatt sem nú er tíu prósent. "Við verðum auðvitað að taka tillit til þess að við erum í alþjóðlegu umhverfi en ég tel að fjármagnstekjuskattur mætti vera eins hár og mögulegt er út frá þeirri forsendu að fjármagnið fari ekki úr landi," segir Magnús. Hann segir að ekkert hafi enn verið rætt um lækkun á tekjuskatti einstaklinga umfram áætlanir en þegar liggi fyrir áætlun um lækkun um eitt prósentustig. Ljóst sé hins vegar að endurskoða eigi virðisaukaskattskerfið. "Það eru ákvæði um það í stjórnarsáttmálanum og ég vænti að það komi einhverjar tillögur um það fljótlega," segir Magnús. Einar Oddur Kristjánsson, varaformaður fjárlaganefndar og þingmaður Sjálfstæðisflokksins, segir aðspurður um skoðanir framsóknarmanna á hækkun fjármagnstekjuskatts að engar samþykktir séu til um slíkt. "Varðandi skatta almennt þá tel ég hins vegar að gæta beri að því að varðveita sjálfan skattstofninn þannig að það verði eftirsóknarvert að greiða skatta sína á Íslandi, bæði fyrir fólk og fyrirtæki. Þess vegna höfum við verið þeirrar skoðunar að það sé í langtímanum hagstætt að lækka skattprósentuna og höfum marglýst því yfir að vinna eigi að því í framtíðinni að afnema undanþágur en auðvitað ber að fara að því með gát og með sátt," segir Einar. Hann segir að hann hafi ekkert heyrt neinar umræður um breytingar á fyrirhuguðum skattalækkunum á einstaklinga en aðspurður um lækkun virðisaukaskatts á matvæli og nauðsynjavörur segir hann: "Eina sem ég veit er að unnið er að endurskoðun á virðisaukaskattskerfinu."