95% sóttu um framhaldsskólavist

95 prósent nemenda úr 10. bekk, eða 4.231 nemandi, sóttu um framhaldsskólavist í ár en aldrei hafa hlutfallslega jafnmargir sótt um skólavist í framhaldsskólum úr einum árgangi. Rafrænni innritun í framhaldsskóla lauk á miðnætti í nótt en þetta var í fyrsta sinn sem nemendum 10. bekkjar gafst færi á að sækja um á Netinu. Verzlunarskóli Íslands, Kvennaskólinn í Reykjavík og Menntaskólinn við Hamrahlíð fengu mun fleiri umsóknir nýnema en þeir geta tekið við. Umsóknir þeirra sem ekki komast að í þessum skólum verða sendar í þá skóla sem nemendur völdu til vara.