Birgðastöðvum lokað í Noregi

Varnarmálaráðherrar Bandaríkjanna og Noregs rituðu á miðvikudag undir samkomulag þess efnis að herstöðvum sem geyma birgðir fyrir Bandaríkjaher verði fækkað úr fimm í tvær. Þá gerir samkomulagið ráð fyrir því að breytingar megi gera á tegund vopnanna og birgðanna sem geymdar eru í landinu fyrir flotadeild Bandaríkjahers. Fyrri samningur landanna um varnarsamstarf var frá árinu 1981. Kristin Krohn Devold, varnarmálaráðherra Noregs, segir tilhögunina leiða til þess að Bandaríkin gætu aðstoðað við varnir Noregs ef þess gerðist þörf, auk þess sem hún gerði kleifa sameiginlegar æfingar herja landanna. Bandaríkjaher hóf að geyma birgðir í Noregi í kalda stríðinu og miðaði þá allur viðbúnaður við hvernig bregðast ætti við innrás Sovétríkjanna. Að loknum blaðamannafundi flugu Donald Rumsfeld, varnarmálaráðherra Bandaríkjanna og Devold saman til Brussel þar sem þeir sátu fund varnarmálaráðherra aðildarríkja Atlantshafsbandalagsins.