Mótmælin í Bólivíu halda áfram

Þrátt fyrir að forseti Bólivíu, Carlos Mesa, hafi sagt af sér í gær eftir að hafa gegnt embætti í aðeins 19 mánuði halda mótmæli í landinu áfram. Fólkið krefst þjóðnýtingar á gasiðnaði í landinu en því var Mesa mótfallinn. Lögreglan hefur þurft að beita táragasi í höfuðborginni, La Paz, þar sem tugþúsundir stjórnarandstæðinga hafa svo gott sem lamað borgina. Mótmælaaðgerðir hafa staðið yfir vikum saman í La Paz og hefur bólivíska þingið ekki getað komið saman til að velja eftirmann Mesas en margir mótmælendanna segja að ekki komi til greina að forseti öldungadeildar þingsins taki við forsetaembættinu. Sá er Hormando Vaca Diez sem tilkynnti í gær að þingið myndi hittast á morgun og vandamálið skyldi leyst en sérfræðingar segja hann ætla sér embættið. Enn streymir fólk úr sveitum landsins til að taka þátt í mótmælunum og óttast sérfræðingar að ef Diez verði forseti muni ástandið versna.