Vilja að trúarleiðtogar hafi áhrif

Trúrækni skilur á milli Bandaríkjamanna og sumra af nánustu bandamönnum þeirra. Bandaríkjamenn eru mun afdráttarlausari í trú sinni á guð og styðja það að blanda saman trúarbrögðum og stjórnmálum í mun ríkari mæli en fólk í öðrum löndum. Þetta er niðurstaða skoðanakönnunar sem AP-fréttastofan lét gera. Íbúar í Vestur-Evrópu, þar sem Benedikt XVI páfi hefur einmitt kvartað undan lítilli kirkjusókn, virðast þeir minnst trúræknu af þeim sem spurðir voru. Einungis Mexíkóar komust nálægt Bandaríkjamönnum hvað trúrækni varðar. Hins vegar eru Mexíkóar mun meira á móti því en Bandaríkjamenn að klerkastéttin beiti stjórnvöld þrýstingi, sem er mjög í takt við þá sögulegu staðreynd að Mexíkóar hafa gjarnan barist gegn áhrifum klerkastéttarinnar. Næstum allir þeir sem svöruðu í Bandaríkjunum sögðu trúarbrögð vera þeim mikilvæg og einungis tvö prósent sögðust hreint ekki trúa á guð. Næstum 40 prósent sögðu að trúarleiðtogar ættu að reyna að hafa áhrif á þá sem valdið hafa. Niðurstöðurnar eru víðast hvar þveröfugar. Stjórnmálaskýrendur eru ekki sammála um það hvað veldur þessum mikla mun á viðhorfi Bandaríkjamanna og annarra þjóða. Sumir vilja meina að það séu eðlislæg viðbrögð að hafna trúarbrögðum eftir því sem þjóð nútímavæðist meira og vilja meina að Bandaríkin séu undantekningin sem sanni regluna. Aðrir vilja meina að Evrópa sé hið óvenjulega; að nútímavæddar þjóðir snúi sér að trúarbrögðum vegna þrár í hið hefðbundna. Enn aðrir vilja skýra þróunina með markaðslögmálum, að eftir því sem framboðið er fjölbreyttara og meira, þeim mun meiri verði eftirspurnin, og það geti að mörgu leyti skýrt stöðu mála. Í Bandaríkjunum, þar sem mikið framboð er af mismunandi trúarbrögðum og söfnuðum og rík hefð fyrir trúfrelsi, sé eftirspurnin að sama skapi meiri. Aftur á móti hafi eftirspurnin minnkað jafnt og þétt í Evrópu, þar sem kirkjan stendur á gömlum merg og minni hefð er fyrir frelsi og fjölbreytni í trúmálum.