Blair fer til fundar við Bush

Tony Blair, forsætisráðherra Bretlands, flaug til fundar við George W. Bush Bandaríkjaforseta í gær. Meðal þess sem efst verður á dagskrá viðræðna þeirra eru útgjöld til þróunarmála í Austur-Afríku, en Blair er í mikið í mun að eyða ágreiningi um það mál áður en leiðtogafundur G8-hópsins hefst í Skotlandi síðar í þessum mánuði. Bandaríkjastjórn hét í gær að veita 674 milljónum Bandaríkjadala, andvirði um 43 milljarða króna, til matvælahjálpar í Erítreu og Eþíópíu, en það breytir ekki þeirri andstöðu sem Bush forseti hefur sýnt viðleitni Blairs til stóraukinna útgjalda til þróunaraðstoðar í Afríku. Blair lét hafa eftir sér í gær að matvælaaðstoðarátak sem þetta væri velkomið sem slíkt, en það væri aðeins brot af því sem ráðast yrði í. Sem forysturíki G8-hóps helstu iðnríkja heims næsta árið hafa Blair og nýendurkjörin ríkisstjórn hans sett á oddinn stefnu sem miðar að stórefldri aðstoð við Afríku og átaki í baráttunni gegn loftslagsbreytingum af mannavöldum. Enn frekar en Afríkuaðstoðin er loftmengunarátakið til þess fallið að skapa núning við ráðamenn í Washington. Ef Blair skyldi takast að telja Bush á að leggja þessum oddamálum lið yrði það til þess fallið að varpa jákvæðara ljósi á pólitískan orðstír Blairs eftir þann skell sem hann mátti þola vegna þess hve sú ákvörðun hans að gera innrás í Írak við hlið Bandaríkjamanna hefur reynst óvinsæl meðal breskra kjósenda. Að mati stjórnmálaskýrenda fer Blair nú til fundar við Bush í vissu um að eiga hönk upp í bakið á honum, en þetta er í fyrsta sinn sem leiðtogarnir tveir hittast eftir naumt endurkjör Blairs fyrir mánuði.