Samið við austfirsk fyrirtæki

Verktakafyrirtækið Bechtel, sem byggir álver Alcoa–Fjarðaáls við Reyðarfjörð, hefur gert tvenna samninga um flutning á starfsfólki til og frá vinnu. Samningarnir voru gerðir að undangengnu lokuðu útboði í vor og í báðum tilfellum var samið við rótgróin fólksflutningafyrirtæki á Austurlandi. Samið var við Tanna Travel á Eskifirði um flutning á fólki á milli starfsmannaþorpsins á Haga við Reyðarfjörð og framkvæmdasvæðis og miðast ferðirnar við vaktaskipti kvölds og morgna. Um 1.500 íbúar verða í starfsmannaþorpinu á Haga sumarið 2006 og verður Tanni Travel í samstarfi við SBA á Akureyri um að koma fólkinu til og frá vinnu. Bechtel hefur einnig samið við Austfjarðaleið í Neskaupstað um flutning á fólki til og frá vinnu frá þeim stöðum sem eru innan við 50 kílómetra frá framkvæmdasvæðinu og um rekstur á strætó sem ganga mun innan framkvæmdasvæðisins. Þá mun Austfjarðaleið einnig sjá um akstur frá starfsmannaþorpinu og á Egilsstaðaflugvöll þegar starfsmenn fara í frí.