Reknir og vikið af vinnustaðnum

"Þeir eru að vinna eftir einhverri mannauðsstefnu þar sem allir eiga að falla svo vel inn í liðið að þeir sem ekki falla alveg inn í þetta eru bara látnir fara," segir Gylfi Ingvason, trúnaðarmaður starfsmanna ALCAN í álverinu við Straumsvík. Mikil óánægja er meðal starfsmanna með að fimm starfsmönnum hefur verið sagt upp frá 1. mars og þykir mönnum sérlega harkalega að uppsögnunum staðið. Markús Kristjánsson er einn þeirra sem var rekinn. "Ég hafði fengið leyfi til að fara í hádeginu þar sem ég varð að fara í jarðarför. Klukkan hálftólf var ég svo boðaður á fund og fékk reyndar ekki að hafa trúnaðarmann með mér eins og ég vildi. Þar var mér sagt upp án nokkurra skýringa. Svo var mér fylgt af svæðinu líkt og fanga. Þannig lauk 30 ára starfsferli mínum á þessum stað." Einn þeirra fimm sem sagt var upp var í sjúkrameðferð á Stykkishólmi þegar hringt var í hann og honum tilkynnt að hans biði uppsagnarbréf þegar hann kæmi heim. Að sögn Gylfa vildu forráðamenn ALCAN tryggja í viðurvist vitna að símtalinu að uppsögnin hefði verið kynnt starfsmanni fyrir mánaðamót. Hann var í meðferð vegna meiðsla sem hann hlaut í starfi en ALCAN viðurkennir ekki að meiðslin séu af þeim toga og er mál hans nú hjá lögfræðingi að sögn Gylfa. Í öðru tilfelli var hringt í starfsmann heim og honum tilkynnt að honum bærist uppsagnarbréf eftir mánaðamótin. Gylfi segir að starfsmenn séu afar ósáttir við að mönnum sé fylgt líkt og föngum út fyrir svæðið eftir að búið er að segja þeim upp. Hrannar Pétursson upplýsingafulltrúi ALCAN segir að hann geti ekki tjáð sig um einstök mál né einstaklinga. Hinsvegar segir hann að mönnum hafi verið tilkynnt um uppsagnir símleiðis þar sem ekki væri öruggt að tilkynningin bærist með öðrum hætti. Trúnaðarráðsfundur fór fram í gær þar sem þessi mál voru rædd og mun stjórn ALCAN berast ályktun frá þessum fundi í dag. Ekki náðist í forstjóra, starfmanna- né ráðningastjóra ALCAN í gær.