Ísland í 3. sæti í jafnréttismálum

Norðurlöndin eru þau staður í heiminum sem best hefur gengið að tryggja jafnrétti kynjanna og er Ísland í þriðja sæti listans. Þetta kemur fram í skýrslu sem stofnunin World Economic Forum birti í gær. Í skýrslunni er reynt að leggja mat á efnahagslega og pólitíska þátttöku kvenna en einnig menntun og heilsufar í alls 58 ríkjum. Ísland kemur fast á eftir Svíþjóð og Noregi sem prýða efstu sæti listans en Danmörk og Finnland eru í fjórða og fimmta sæti listans. Evrópusambandsríki eru í tíu af fimmtán efstu sætunum á listanum í skýrslunni en Nýja-Sjáland er þar í sjötta sæti, Kanada í sjöunda sæti, Bretland í því áttunda og Ástralía í því tíunda. Það kemur eflaust einhverjum á óvart en Bandaríkin eru í 17. sæti listans. Staða jafnréttismála er verst í Egyptalandi, Tyrklandi, Pakistan, Jórdaníu og Suður-Kóreu. Augusto Lopez-Claros, hagfræðingur stofnunarinnar, segir að Norðurlöndin, sem búi við heildstætt velferðakerfi og gagnsæja stjórnarhætti, séu heppileg viðmiðun þegar lagt sé mat á efnahagslega þýðingu jafnréttis kynjanna og önnur lönd gætu lært mikið af þessum fimm ríkjum í norðri.