Listahátíð líka utan höfuðborgar

Listahátíð í Reykjavík var sett í dag með pompi og prakt. Hátíðin verður þó ekki bundin við höfuðborgina því í ár er hún helguð alþjóðlegri samtímamyndlist og verður á þriðja tug sýninga allt frá Dagsbrún undir Eyjafjöllum til Eiða á Austurlandi. Dagurinn hófst með ferð út í Viðey þar sem grunnskólabörn, sem eru virkir þátttakendur í hátíðinni, deildu reynslu sinni af samstarfi við ýmsa listamenn og gestum gafst færi á að skoða Blinda skálann, verk Ólafs Elíassonar frá Feneyjatvíæringnum árið 2003. Skálinn var fluttur hingað frá Berlín í tæplega 300 pörtum og settur upp á Sjónarhóli í Viðey en það var listamaðurinn sjálfur sem valdi honum stað. Ólafur Elíasson segir að hugmyndin með Blinda skálanum sé vekja þá spurningu hvað það þýði að líta eða kíkja út og einnig að vinna með sjóndeildarhringinn á Íslandi, en hann hafi unnið með hann áður. Hann hafi leitað að stað nálægt borginni sem væri eins konar útsýnishóll og Sjónarhóll sé mjög góður sem slíkur. Skálinn verður í Viðey að minnsta kosti fram yfir Menningarnótt í ágúst en ekkert er ákveðið með framhaldið. Ólafur er ánægður með gróskuna í íslensku listalífi. Kannski hafi hann ekki tekið eftir því áður fyrr, en það sé alltaf eitthvað að breytast, en það vanti stuðning frá listamarkaðnum í mörgum sýningarsölum, það skorti á að fólk kaupi listaverk og setji þau upp heima hjá sér. Allt sé komið af stað en hann voni að fólk kaupi fleiri listaverk. Hátíðin var síðan sett formlega á hádegi í Listasafni Reykjavíkur og viðamikil sýning á verkum Dieters Roth var opnuð um leið. Sýningin ber heitið Lest og er nokkurs konar kjarni myndlistarþáttar listahátíðarinnar og ein viðamesta sýning sem listasöfnin í Reykjavík hafa ráðist í. Meira en tuttugu sýningar verða opnaðar á næstu dögum á tíu stöðum á landinu. Þótt aðaláherslan sé á samtímamyndlist á Listahátíðinni í ár má ekki gleyma að fjölmörg önnur atriði eru í boði: sirkus, dans og margvísleg tónlistaratriði, allt frá mongólskum barkasöngvurum til portúgalskra fadúdrottninga. Hátíðinni lýkur 5. júní.