Verðið sagt platverð

Innflutningur á amerískum bílum, nýjum eða notuðum, hefur aukist gríðarlega og fer þessi innflutningur að stærstum hluta fram á vegum einyrkja sem flytja inn bílana í nafni kaupendanna og firra sig þar með ábyrgð. Snorri Páll Jónsson, framkvæmdastjóri IB, segir að verð sem viðgangist á markaðnum séu "fixuð". Egill Jóhannsson, forstjóri Brimborgar, tekur undir þessa skoðun. "Það er altalað að það kemur nánast ekki bíll til landsins nema 5.000 dollarar séu greiddir undir borðið og gefinn út lægri reikningur sem þessu nemur. Menn spara vörugjöldin því að þau eru yfirleitt hæst á þessum bílum og virðisaukann líka. Auðvitað hefur Tollurinn ákveðnar leiðir til að koma í veg fyrir þetta en þegar innflutningurinn er svona gríðarlega mikill þá hef ég enga trú á að Tollurinn anni því," segir Egill. Bæði IB og Brimborg eru í samband við sölumenn í Bandaríkjunum og fullyrða stjórnendur beggja fyrirtækja að ekki sé hægt að bjóða ameríska bíla jafn ódýrt og gert er án þess að eitthvað sé athugavert við það. "Innflytjendurnir fá gefinn út reikning erlendis sem hefur verið lækkaður til að lækka vörugjöld og virðisaukaskatt. Þannig er hægt að bjóða bílana á betra verði," segir Snorri Páll. "Tollstjóraembættið hefur gert ítrekaðar tilraunir til að rannsaka bílainnflutninginn frá Bandaríkjunum. Ef verðið passar ekki við almennt viðmiðunarverð er ástæðan sú að gefinn hefur verið út rangur reikningur. Við sem verslum beint við heildsala í Bandaríkjunum kaupum hundruð bíla á ári vitum að einstaklingur getur ekki fengið bíla á 20-30 prósentum lægra verði," segir hann. Tollstjórinn í Reykjavík, Snorri Olsen, segir að embættið fylgist með innflutningi bíla frá Bandaríkjunum og sín tilfinning sé sú að tilvik með fölsuðum reikningum séu ekki hlutfallslega fleiri en áður og reikningum sé ekki vísað oftar til hliðar vegna fráviks frá markaðsverði en áður. Í innflutningi á notuðum bílum kunni þó að vera meiri hætta á fölsuðum reikningum.