Frumvarpið veikir samkeppnislög

Samkeppnisstofnun telur nýtt frumvarp til samkeppnislaga beinlínis fela í sér veikingu á samkeppnislögum. Þetta kemur fram í afar gagnrýninni umsögn stofnunarinnar um frumvarpið. Umsögn Samkeppnisstofnunar um samkeppnislagafrumvarpið er afdráttarlaus. Þar segir meðal annars: „...frumvarp til nýrra samkeppnislaga felur í sér veikingu á samkeppnislögum.“ Eru þar einkum nefnd þrjú atriði: 1. Ekki er gert ráð fyrir auknum rannsóknarúrræðum samkeppnisyfirvalda. 2. Felld hefur verið niður mikilvæg tillaga um að samkeppnisyfirvöld geti skotið málum til dómstóla. 3. Í frumvarpinu eru gerð mun minni hæfisskilyrði til þeirra sem skipa munu fyrirhugaða stjórn Samkeppniseftirlitsins en gert var ráð fyrir í fyrri drögum. Í frumvarpinu er meðal annars lagt til að Samkeppnisstofnun og Samkeppnisráð verði lögð niður og ný stofnun, Samkeppniseftirlitið, taki við flestum verkefnum. Samkeppniseftirlitið á síðan að verða skipað þriggja manna stjórn sem skal samþykkja allar meiriháttar ákvarðanir stofnunarinnar og gæta þess að „tryggja enn frekar að meðalhófs sé gætt í öllum aðgerðum hennar.“ Samkeppnisstofnun er á móti þessum stjórnsýslubreytingum og segir í umsögninni: „Helstu forsendur fyrir tillögum frumvarpanna um breytingar á stjórnsýslu í samkeppnismálum fá ekki staðist.“ Og enn fremur að „...í frumvarpinu gætir nokkurs rökræns ósamræmis.“ Um tvær vikur eru síðan efnahags- og viðskiptanefnd fékk umsögnina í hendur. Guðmundur Sigurðsson, yfirmaður samkeppnissviðs Samkeppnisstofnunar, vildi ekki tjá sig um efni skýrslunnar. Hlutverk stofnunarinnar hefði verið að leggja mat á frumvarpið og skila umsögn til nefndarinnar. Svo væri annarra að ákveða hversu mikið mark yrði tekið á henni.