Óánægja hjá slökkviliðsmönnum

Megn óánægja er meðal slökkviliðsmanna á Keflavíkurflugvelli með framkomu starfsmannahalds varnarliðsins. Þetta segir háttsettur slökkviliðsmaður í samtali við Víkurfréttir. Heimildarmaðurinn segir að enn hafi reynt á þolrif slökkviliðsmanna þegar tilkynning frá starfsmannahaldinu var hengd upp á slökkviliðsstöðinni í síðustu viku. Þar er tekið fram að launum þeirra starfsmanna sem hafði verið sagt upp verði haldið eftir ef þeir skila aðgöngupassanum sínum ekki á réttum tíma. „Þetta sýnir það bara að þeir sem sjá um þessi mál eru löngu hættir að líta á starfsmennina á vellinum sem fólk,“ segir viðmælandinn. Í svari upplýsingafulltrúa varnaliðsins við fyrirspurn Víkurfrétta kemur fram að þar sem varnarsvæðið sé öryggissvæði með takmörkuðum aðgangi beri starfsmönnum, sem ljúka störfum, að skila aðgangspassa til vinnuveitenda, enda sé það liður í formlegum starfslokum. „Bregðist starfsmaður þeirri skyldu sinni á atvinnurekandi á Keflavíkurflugvelli ekki annars úrkosta en að fresta lokauppgjöri þar til bætt hefur verið úr.“ Vernharð Guðnason, formaður Landssambands slökkviliðs- og sjúkraflutningamanna, segir í samtali við Víkurfréttir að sambandið muni ekki sætta sig við þessar aðgerðir. „Þeir hafa engan rétt á að halda eftir einhverju sem þeir eiga ekki. Ef laun verða ekki greidd fara þau bara í innheimtu. Það er svo einfalt.“ Slæmt ástand hefur myndast meðal starfsfólks á vellinum í óvissuástandi síðustu mánaða sem hófst með einhliða uppsögnum varnarliðsins á einstökum liðum kjarasamninga. Heimildamaður Víkurfrétta segir að vinnubrögð við uppsagnir starfsfólks séu einkennileg, svo ekki sé meira sagt. Þar væri ekki farið eftir reynslu, menntun eða hæfni og hefur það haft mikil og neikvæð áhrif á vinnuandann. „Það er alveg grafalvarlegt hvernig komið er fram við starfsfólkið á vellinum. Það skilar sér í því að mórallinn á vinnustaðnum er alveg búinn. Áður var þetta þannig að menn lögðu sig alla fram af ánægju við að sinna sínu starfi vel, en nú eru menn hræddir um sig og sína afkomu.“