Ferdinand ekki á leið til Chelsea

Orðrómurinn um að varnarmaðurinn Rio Ferdinand ætti í viðræðum við Chelsea hefur verið kæfður í fæðingu af stjórnarformanni Chelsea, Peter Kenyon. Ferdinand sást á veitingahúsi með stjórnarformanninum í vikunni og fréttirnar af fundi þeirra breiddust eins og eldur í sinu út um allt England. Kenyon var fljótur til og hringdi í kollega sinn hjá Manchester United og fullvissaði hann um að það hefði verið alger tilviljun að þeir hittust á veitingastaðnum, hann hefði aðeins verið að spjalla við umboðsmann Ferdinand og sagði að leikmaðurinn hefði birst óvænt á staðnum. Kenyon má ekki við því að svona sögur fari á kreik, því eins og frægt er orðið á lið Chelsea enn yfir höfði sér hugsanlega refsingu fyrir að hafa samkvæmt heimildum átt leynilegan fund með Ashley Cole, leikmanni Arsenal með það fyrir augum að lokka hann til félagsins.