Snæfell, Keflavík og Fjölnir áfram

Snæfell, Keflavík og Fjölnir tryggðu sér sæti í undanúrslitum Intersportdeildarinnar í körfuknattleik með sigri á heimavöllum sínum í kvöld. Fjölnir vann Skallagrím með tveimur stigum, 72-70, í miklum háspennuleik þar sem úrslitin réðust á vítalínunni tveimur sekúndum fyrir leikslok. Benedikt Guðmundsson, þjálfari Fjölnis, var ánægður með sigurinn. "Við vanmetum engan, ofmetum engan, berum virðingu fyrir öllum liðum og óttumst engan," sagði Benedikt, aðspurður hvaða lið hann vildi fá í undanúrslitum. Snæfell átti í basli með KR í fyrri hálfleik í Stykkishólmi og sérstaklega með Cameron Echols sem skoraði 22 stig í hálfleiknum. Heimamenn náðu að halda honum í sjö stigum í seinni hálfleik og unnu öruggan sigur, 116-105. "Þetta bjargaðist einhvern veginn og herra Sigurður Þorvaldsson tók leikinn í sínar hendur, einstök heppni hjá honum þar sem boltarnir rúlluðu ofan í hver á fætur öðrum," sagði Hlynur Bæringsson, fyrirliði Snæfells. Grindavík freistaði þess að slá út nágranna sína í Keflavík en sterkur heimavöllur Keflvíkinga gerði gæfumuninn í oddaleiknum og lokatölur urðu 80-75. "Þetta voru tvö frábær lið að spilam," sagði Sigurður Ingimundarson, þjálfari Keflavíkur. "Þetta er alveg ný keppni, staðan í deildinni skipti engu máli fyrir þennan leik en við töpum ekki svona leikjum á heimavelli," sagði Sigurður. Einar Einarsson, þjálfari Grindavíkur, sagði að tapið væri sárt. "En það er engin skömm af því að tapa fyrir meisturunum," sagði Einar. "Við vorum að klikka á litlum hlutum í vörninni og það þarf örlitla heppni í þessu þótt að hún sé ekki til í íþróttum," sagði Einar. Keflavík mætir ÍR í undanúrslitum og Snæfell mætir Fjölni.