Óttast umhverfisslys við Noreg

Óttast er að meiri háttar umhverfisslys verði ef 800 tonn af olíu leka í sjóinn við strendur Suður-Noregs, þar sem olíuflutningaskip stendur í björtu báli. Eldtungur teygja sig hátt og sprengingar kveða við úr skipinu. Eldurinn virðist hafa kviknað í vélarrúmi skipsins seint í gærkvöld. Klukkan átta í morgun var eldhafið orðið mikið og leit út fyrir að skipið myndi reka í átt að landi. Akkerum var kastað klukkan sex í morgun og tókst að koma taug um borð í skipið úr flutningaskipi til að hindra hugsanlegt rek. Björgunarþyrlum tókst í nokkrum ferðum að ná 28 manna áhöfn úr brennandi skipinu og voru ellefu fluttir á sjúkrahús. Meiðsli þeirra munu vera minni háttar. Skipið, sem nefnist Fjord Champion, er 30 þúsund tonn og 170 metra langt. 800 tonn af olíu eru um borð. Takist ekki að hemja eldinn er óttast að olían leki út í hafið en engin merki sjást enn um olíu í sjónum umhverfis skipið. Mikill viðbúnaður er vegna mengunarvarna. Skipið hallar nú örlítið á stjórnborða en eins og málin standa virðast olíutankarnir óskemmdir.