Efast um að fé fari til fatlaðra

Rúmlega átta þúsund fermetra húsnæði hefur verið byggt á Sólheimum, þar sem aðeins 40 fatlaðir búa. Þar á meðal er bygging sem er leigð út fyrir ráðstefnuhald og kirkja sem rúmar tvöfaldan íbúafjölda Sólheima. Stjórnarmaður Þroskahjálpar á Suðurlandi segir þetta brandara og fyrrverandi starfsmaður Sólheima vill heldur sjá fénu varið í að bæta þjónustuna við fatlaða. Sólheimar í Grímsnesi. Fallegt lítið þorp þar sem fjörtíu fatlaðir búa. Í ljós kom fyrir tæpum tveimur árum að milljónir króna af ríkisfé sem átti að renna til umönnunar þeirra var ekki notað eins og kveðið var á um. Sættir tókust og nú greiðir ríkið 164 milljónir á ári til Sólheima, nákvæmlega er skilgreint í hvað peningarnir eiga að fara. Uppbyggingin á svæðinu er ótrúlega mikil svo ekki sé meira sagt. Til dæmis var um aldamótin tekið í notkun 460 fermetra hús með vinnustofum og sýningarsal. Þremur árum seinna var vígt 800 fermetra samkomuhús, Sesseljuhús, sem kostaði 130 milljónir. Og nú er verið að reisa kirkju sem tekur 200 manns í sæti en innan við 15 kílómetrar eru í næstu kirkju. Þessar byggingar eru reistar fyrir söfnunarfé. Bjarni Harðarson, stjórnarmaður í Þroskahjálp á Suðurlandi, segir að að auðvitað sé látið í veðri vaka að verið sé að styrkja eitthvað sem gagnist fötluðum. Það sé búið að byggja hótel, listhús og ýmsar byggingar sem gangist hinum fötluðu ekki neitt enda byggingarmagnið að orðið hrein skrýtla. Þessi hús og aðrar byggingar sem skráð eru í landsskrá fasteigna telja samtals yfir átta þúsund fermetra sem gerir á þriðja hundrað fermetra á hvern af hinum fjörtíu fötluðu heimilismönnum. En í hvað eru húsin notuð, til dæmis hið 800 fermetra Sesseljuhús? Agnar Guðlaugsson, framkvæmdastjóri Sólheima, segir að húsið sé notað sem bíó og þar sé horft á Idolið og Evróvisjón og knattspyrnuleiki svo eitthvað sér nefnt. Auk þess sé húsið leigt út fyrir ráðstefnur og minni herbergi notuð sem fundarsalir. Og kirkjan. Ráðinn hefur verið prestur að Sólheimum sem einnig gegnir starfi félagsmálafulltrúa. En aðeins 15 km frá Sólheimum er kirkjan að Mosfelli og þar er starfandi prestur. Agnar segir að það hafi verið talið til hæfi að hafa kirkju á staðnum og það hafi verið stefna stjórnar Sólheima í langan tíma að byggja kirkju. Auk þess segir Agnar að kirkjan á Mosfelli sé of lítil til að rúma allt heimilisfólk á Sólheimum. Rut Gunnarsdóttir, félagsmaður í félagi fyrrverandi starfsmanna á Sólheimum, er þeirrar skoðunar að allt fé sé ekki nýtt í þágu fatlaðra. Hún segir að henni finnist það vera aðalatriði að fatlaða fólkið búi að Sólheimum og starfsemin þar eigi að snúast um það en ekki eitthvað allt annað. Þess vegna eigi peningarnir að fara í þjónustu við fólkið. Agnar segir hins vegar klárt að ekkert af því fé sem er eyrnamerkt fötluðum fari í þessar byggingar. Stjórn Sólheima hafi verið dugleg að safna fé til uppbyggingar á Sólheimum. Bjarni Harðarson segir hins vegar að verið sé að taka fé frá öllum fötluðum í landinu en víða sé neyðarástand í búsetumálum og þjónustumálum fatlaðra. Þetta hafi verið peningar sem fyrirtæki hafi verið tilbúin að leggja til fatlaðra. Starfsemi Sólheima hófst fyrir sjötíu og fimm árum í tjöldum og bárujárnsskúr. Nú er þar meðal annars rekið hótel og ráðstefnu- og veisluþjónusta auk ýmiss konar lífrænnar framleiðslu. Í framkvæmdaáætlun Sólheima er mörkuð sú stefna að ljúka við eina stóra framkvæmd fimmta hvert ár. Bandaríska tímaritið Communities kaus Sólheima besta sjálfbæra byggðahverfi í heimi fyrir ári.