Sigur kemur með starfhæfri stjórn

Írakar sýndu uppreisnar- og hryðjuverkamönnum í tvo heimana með því að streyma á kjörstaði þrátt fyrir hótanir og árásir. Kosningarnar í gær þykja marka tímamót en sigurinn er þó ekki sagður í hendi fyrr en starfhæfri stjórn hefur verið komið á laggirnar. Yfirkjörstjórn Íraks segir talningu ganga vel en að tíu dagar séu þangað til endanleg úrslit liggi fyrir. Þessi langi tími er meðal annars ætlaður til þess að kanna og bregðast við kvörtunum sem kunna að berast. Alls er talið að um átta milljónir manna hafi greitt atkvæði í kosningunum í gær, en það eru um sextíu prósent þeirra sem voru á kjörskrá og mun betri kjörsókn en búist var við. Í dag segja fréttaritarar í Írak frá því að fólk sýni víða með stolti blekbláan vísifingur, merki þess að almenningur hafi ekki látið hryðjuverkamenn hræða sig frá kjörstað. Í gær óttuðust margir að blái fingurinn, sem er merking sem þeir sem greitt hafa atkvæði fá, væri hálfgerð dauðamerking. Þó að hryðjuverkamenn hafi fellt þrjátíu og fimm og gert þónokkrar árásir var ástandið ekki nándar nærri eins slæmt og óttast var. „Heimurinn heyrir rödd frelsis óma frá Miðausturlöndum,“ sagði Bush Bandaríkjaforseti í gær og lýsti kosningarnar afgerandi sigur. Sérfræðingar vara þó við því að kosningarnar verði sagðar sigur því að sigurinn geti einungis falist í því að koma á starfhæfri ríkisstjórn í kjölfarið sem veltur ekki síst á því hvernig súnnítar líta á málið. Víða á svæðum þeirra var kosningaþátttaka dræm en ekki er enn ljóst hversu hátt hlutfall þeirra nýtti sér atkvæðisrétt sinn. Ljóst er að sjítar hafa mjög sterka stöðu að loknum kosningunum og það gæti nægt til að hleypa illu blóði í súnníta sem voru valdastéttin á tíma Saddams Husseins en eru nú valdalítill minnihlutahópur. Þó að uppreisnar- og hryðjuverkamenn hafi ekki valdið þeim blóðsúthellingum í gær sem óttast var segja bæði talsmenn bandarískra og breskra yfirvalda ekki ólíklegt að andspyrnan muni harðna og árásum enn fjölga á næstu vikum og mánuðum, þegar Abu Musab al-Zarqawi og menn hans refsa þeim sem kusu og halda áfram herferð gegn hersetuliðinu. Sem stendur eru gerðar um sjötíu árásir á dag en talið er að kjarni hryðjuverkahópanna samastandi af um 40 þúsund mönnum sem njóti aðstoðar 160 þúsunda til viðbótar. Þó að talið sé að 32 þúsund uppreisnar- og hryðjuverkamenn hafi verið felldir í Írak frá því að Saddam Hussein var komið frá völdum virðist sem enn sé nóg eftir.