Helfararinnar minnst

Fjölmargir gyðingar sem lifðu af helför nasista í seinni heimsstyrjöldinni komu saman í útrýmingarbúðunum Auschwitz-Birkenau í gær til að minnast þess að 60 ár voru liðin síðan sovéskir hermenn frelsuðu gyðinga úr búðunum. Sex milljónir gyðinga létust í helförinni. Auk þeirra sem lifðu helförina af voru fjölmargir heimsleiðtogar saman komnir í Póllandi vegna minningarathafnarinnar sem og gamlir hermenn Rauða hersins og Jóhannes Páll páfi II. Moshe Katsav, forseti Ísraels, lagði áherslu á það í ræðu sinni að aldrei mætti afskræma sögu helfararinnar. Þá beindi hann einnig orðum sínum að leiðtogum Evrópuríkja og bað þá að vera á varðbergi gagnvart uppgangi nýnasisma meðal ungra Evrópubúa sem þekktu ekki söguna. Anatoly Shapiro, 92 ára fyrrverandi hermaður Rauða hersins, minnist þess þegar hermennirnir gengu fyrst inn í búðirnar. "Bak við fyrstu hurðina sem við opnuðum hafði nöktum líkum verið raðað upp. Það var blóð alls staðar. Lyktin var svo hræðileg að það var ekki hægt að vera inni lengur en í fimm mínútur."