Viðbúnaður vegna prófaloka

Mikill viðbúnaður er í dag, lokadag samræmdra prófa, og hafa lögregla og ýmis samtök tekið saman höndum. Tíundu bekkingum verður m.a. boðið í ferðir og upp á ýmsa aðra afþreyingu til að fagna próflokunum.  Börn í tíunda bekk eru nú um það bil að fara að ljúka náttúrufræðiprófi en það er síðasta samræmda prófið. Eins og flestum er kunnugt fara fagnaðarlætin stundum úr böndunum þegar tíundu bekkingar ljúka prófalotunni með miður skemmtilegum afleiðingum oft á tíðum. Félagsþjónustan í Reykjavík, Íþrótta- og tómstundaráð, SAMFOK og Lögreglan í Reykjavík hafa tekið höndum saman til að draga úr óæskilegri hópamyndun og drykkju meðal barna. Meðal þess sem gert er er að bjóða krökkunum upp á aðra valkosti en að safnast saman og drekka. Stefanía Sörheller hjá Félagsþjónustunni í Reykjavík segir krakkana hafa tekist á við erfiða hluti að undanförnu og í langflestum skólum fari langflestir krakkar í ferðir eða fagni á annan hátt vegna próflokanna. Stefanía segir enn fremur að tíundu bekkingar hafi undanfarin ár sýnt áhuga á öðrum valkostum við að fagna prófalokum. Margir nýti sér þá og ástandið hafi batnað undanfarin ár. Nú njóti mun fleiri krakkar tímamótanna með þessum hætti en áður var. Árangur hafi náðst með samstilltu átaki. Langflestir krakkarnir séu í góðum málum en ekki þurfi mikið út af að bregða til að skyggja á það. Augljóslega kemur þessi dagur árlega og því spurning hvort að hann valdi þeim sem að þessum málum vinna kvíða? Stefanía segir engan kvíða fyrir deginum. Unglingunum og þeim sem standa að baki þeim sé treyst til þess að hjálpast að við að gera tímamótin ánægjuleg og yfirvöld trúi því og treysti að þannig verði það.