Þeir tekjuminnstu græða ekkert

Skerðingarhlutfall námslána lækkar en frítekjumark er lagt niður samkvæmt nýjum úthlutunarreglum sem stjórn Lánasjóðs íslenskra námsmanna hefur samþykkt. Grunnframfærsla námsmanna hækkar jafnframt úr 79.500 krónum í 82.500 krónur. Stærsta breytingin er sú að skerðingarhlutfallið lækkar úr 33 prósentum tekna eftir skatt í fjórtán prósent af öllum tekjum. Hingað til hafa fyrstu 300 þúsund krónur í tekjum ekki skert námslánin en frítekjumarkið fellur nú niður. Samkvæmt útreikningum lánasjóðsins hækka ráðstöfunartekjur námsmanna um sjö prósent að meðaltali. Fulltrúar námsmanna benda hins vegar á að afnám frítekjumarks kemur í veg fyrir að námsmenn með lágar tekjur hagnist á breytingunum. Því verða þau fimmtán prósent námsmanna sem hafa lægstar tekjur af kjarabót en á móti kemur að aukin tækifæri opnast fyrir námsmenn til að framfleyta sér með vinnu. Þeir sem hagnast mest á breytingunni eru námsmenn með tekjur nálægt skattleysismörkum.