Erlendum körlum fjölgar eystra

Íbúum Austurlands fjölgaði um 4,6 prósent í fyrra og er það meiri fjölgun en í nokkrum öðrum landshluta, samkvæmt tölum Hagstofu Íslands. Næst mest fjölgaði fólki á höfuðborgarsvæðinu eða um 1,3 af hundraði. Aðflutningur fólks til Austurlands vegna virkjana- og stóriðjuframkvæmda hefur snúið fólksfjöldaþróun á svæðinu við síðustu ár en áratugina þar á undan fækkaði fólki þar líkt og annars staðar á landsbyggðinni. Samsetning íbúa á Austurlandi hefur breyst verulega síðustu ár og hlutfallslega mun fleiri íbúar eru þar af erlendum uppruna en í öðrum landshlutum. Þannig eru ríflega ellefu prósent karla með erlent ríkisfang og liðlega fjögur prósent kvenna, en landsmeðaltalið er í kringum þrjú og hálft prósent. Miklir búferlaflutningar karla til Austurlands síðustu ár hafa líka skekkt kynjaskiptinguna á svæðinu og eru þar nú tæplega tólf hundruð karlar á hverjar eitt þúsund konur.