Ég sakna mannsins míns svo sárt

"Ég sakna mannsins míns svo sárt," sagði hin unga ekkja, Thanh Viet Mac, þegar Fréttablaðið heimsótti hana á heimili hennar í Breiðholtinu í gær. Það er mikill harmur kveðinn að Viet eftir að eiginmaður hennar Vu Van Phong var stunginn til bana í Hlíðarhjalla í Kópavogi að kvöldi hvítasunnudags. Eftir stendur unga konan, fædd 1978, ásamt þriggja ára dóttur þeirra. Viet er nýlega orðin ófrísk aftur og lífið brosti við ungu hjónunum þar til hinn skelfilegi atburður átti sér stað fyrir fáeinum dögum. Þau unnu bæði í efnalauginni Mjódd og hafa verið þar afar vel látin. Tveir vinir Viet voru staddir hjá henni í gærmorgun. Kalla varð til túlk svo blaðamaður gæti rætt við hana því hvorki hún né aðrir viðstaddir gátu gert sig skiljanleg á íslensku. Þau ræddu saman á móðurmáli sínu víetnömsku meðan beðið var eftir túlkinum og var greinilegt af látbragði þeirra að þau voru að fara í gegnum voðaatburðinn þegar eiginmaður Viet var stunginn til bana. Eftirtektarvert var hve fólkið var æðrulaust í sorg sinni. Í stofunni stóð dúkað borð með mynd af hinum látna, logandi kerti og reykelsi, víni og matvæli samkvæmt víetnamskri hefð. Fjöldamargir blómvendir höfðu borist og stöðugur straumur fólks verið í heimsókn til hennar til að votta henni samúð. Sumar fjölskyldurnar höfðu komið oftar en einu sinni. Síðdegis í gær eða í dag átti að liggja fyrir ákvörðun um hvenær eiginmaður hennar yrði jarðaður. "Ég hef lítið getað hugsað til framtíðar, það er svo skammt um liðið frá því að maðurinn minn dó," sagði Viet. "Ég veit samt að það á eftir að reynast mér mjög erfitt að sjá mér og fjölskyldu minni farborða. Við keyptum íbúðina okkar 2002 og fengum 90 prósent lán til að fjármagna kaupin. Af þessu þarf vitanlega að borga og reka heimilið. Ég veit ekki hvernig ég mun leysa það." Viet kvaðst ekki vera með há laun. Hún hefði ekki bílpróf, en þyrfti að koma dóttur sinni í leikskóla og komast sjálf í vinnuna í Kópavogi. "Ég verð bara að reyna nú að taka eitt í einu," sagði þessi unga kona, aðdáanlega sterk í sorg sinni. DV hefur hrundið af stokkunum fjársöfnun í samvinnu við Rauða kross Íslands sem sér um vörslu þess fjár sem safnast. Þeir sem vilja styrkja ungu ekkjuna, dóttur hennar og ófædda barnið geta lagt inn á reikning nr: 301 - 26 - 350. Kennitala RKÍ er 530269 - 1839.