Matur hefur lækkað um þriðjung

Vöruverð hefur lækkað umtalsvert hjá Krónunni, Bónus og í Fjarðarkaupum síðan um áramótin en mun minna hjá öðrum verslunum samkvæmt þriðju verðkönnun Alþýðusambands Íslands sem birt var í gær. Er þetta þriðja könnun samtakanna á þessu ári og vekur athygli að vöruverð hefur hvergi hækkað síðan síðasta könnun var gerð um miðjan mars. Áberandi mikill munur er milli lágvöruverslana og annarra stórmarkaða á hæsta og lægsta verði og reyndist munurinn á dýrustu og ódýrustu vörukörfunni þannig vera um hundrað prósent. Er það mun meiri munur en mælst hefur áður í öðrum könnunum ASÍ. Mest hlutfallsleg lækkun á vöruverði mældist í Bónus en vörukarfan þar lækkaði um 37 prósent milli kannanna. Í Krónunni lækkuðu verð um 33 prósent. Aðrar verslanir standa þeim nokkuð að baki. Í Fjarðarkaupum lækkaði karfan um tæp fimmtán prósent, tæp tíu prósent í Samkaupum en minna en sex prósent hjá Nóatúni, Hagkaupum og Sparkaupum. Reyndar meta samtökin það svo að ólíklegt verði að teljast að þessi mikli munur fái staðist til lengdar og reikna með að saman dragi með verslunum þegar fram líða stundir en þangað til njóta neytendur góðs af. Í umræddri vörukörfu voru algengar mjólkurvörur, ávextir, grænmeti, morgunkorn, kaffi, ostur og brauð eða vörur sem að jafnaði sjást á borðum fjölskyldna hér á landi. Mest lækkun í Bónus reyndist vera á fjórum lítrum af nýmjólk en lækkunin frá því í febrúar reyndist vera 65.8 prósent. Hjá Krónunni reyndist kíló af grænum vínberjum hafa lækkað mest eða um 67.6 prósent og 150 gr. af Camembert osti lækkaði hlutfallslega mest í Fjarðarkaupum eða um 35.2 prósent. Fólki er bent á að kynna sér könnunina á heimasíðu Alþýðusambandsins, asi.is.