Prófkjörið fer of hratt af stað

Júlíus Vífill Ingvarsson hefur enn ekki tilkynnt um framboð sitt til prófkjörs sjálfstæðisflokksins. Í samtali við Fréttablaðið sagðist Júlíus mjög fljótlega gera grein fyrir því hvaða sæti hann hyggðist taka. "Mér hefur þótt prófkjörið fara of snemma af stað. Maður verður að kunna að halda ró sinni og ákveða tímasetningar sjálfur. Ég á ekki í neinum vandræðum með að taka ákvörðun - það er ekki það sem tefur. Menn þekkja það sem æfa keppnislið að mestu skiptir að liðið sé í hámarksþjálfun og nái bestum árangri í sjálfum úrslitaleiknum. Það er ekkert gagn að því að vera bestur á meðan æfingaleikirnir standa ennþá yfir," segir Júlíus Vífill.