Fangar reyndu fjöldasjálfsmorð

Að minnsta kosti 23 fangar í fangabúðunum við Guantanamo-flóa reyndu að svipta sig lífi á vikutímabili í ágúst árið 2003. Sjálfsmorðstilraunirnar eru sagðar hafa verið skipulagðar aðgerðir og ætlaðar til að koma fangavörðum og yfirvöldum í uppnám. Bandarísk yfirvöld þögguðu málið niður á sínum tíma en staðfestu á mánudag að þessi atvik hefðu átt sér stað. Þau segjast líta á þetta sem tilraun fanga til að vekja á sér athygli frekar en alvarlega sjálfsmorðstilraun. Fangarnir reyndu flestir að hengja sig eða kyrkja. Ekki er ljóst hvernig fangarnir skipulögðu fjöldasjálfsmorðstilraunirnar; fangarnir voru í stálbúrum og geta rætt við samfanga sína en fylgst er með öllum samtölum. Samkvæmt upplýsingum frá bandarískum yfirvöldum reyndu alls 350 fangar í Guantanamó að "veita sér áverka" og þar af reyndu 120 að hengja sig. Rúmlega 500 fangar eru í fangabúðunum og sumum hefur verið haldið þar um árabil án þess að þeir hafi verið kærðir.