Beraði sig fyrir framan stúlkur

Lögreglan í Reykjavík leitar nú karlmanns sem beraði kynfæri sín fyrir framan tvær ungar stúlkur í Reykjavík í gær. Stúlkurnar, sem eru níu ára gamlar, voru á gangi á Eggertsgötu í Reykjavík um sexleytið í gær þegar maðurinn gaf sig á tal við þær. Geir Jón Þórisson, yfirlögregluþjónn í Reykjavík, segir manninn í kjölfarið hafa berað á sér kynfærin og við það hafi þær stokkið í burtu. Þær hafi brugðist hárrétt við og haft strax samband við lögreglu. Lýsing á manninum hafi verið send til allra lögreglubíla en því miður hafi ekki náðst til hans enn þá. Aðspurður hvort mál sem þessi séu algeng í Reykjavík segir Geir Jón að þau komi upp af og til. Heyrst hafi af nokkrum á umliðnum mánuðum en sem betur hafi það ekki orðið alvarlegra en atvikið í gær, en nóg sé það samt. Þá biður Geir Jón þá sem hugsanlega hafi orðið vitni að atvikinu að hafa samband við lögregluna því minnstu vísbendingar geti komið að gagni.