Flugstjórinn starfaði á Íslandi

Flugstjóri flugvélarinnar sem fórst í Grikklandi á sunnudaginn starfaði hjá flugfélaginu Bláfugli á Keflavíkurflugvelli fyrir um ári. Þórarinn segir Hans Jurgen hafa starfað skamma hríð hjá Bláfugli. Hann hafi komið til starfa í gegnum áhafnaleigu eins og oft þegar flugmenn eru ráðnir í einhvern ákveðin tíma. Flugvélin sem Merten flaug fyrir Bláfugl var af gerðinni Boeing 737-300 en það er sama gerð og hann flaug í sinni hinstu ferð fyrir flugfélagið Helios Airways. Merten vann fyrir áhafnaleiguna Direct Personnel International á Írlandi. Að minnsta kosti tvö íslensk flugfélög starfa með því fyrirtæki. Framkvæmdastjóri flugfélagsins, Hans Waremen, sagði í samtali við Víkurfréttir að fyrirtæki hans ætti eftir að hjálpa til við rannsóknina en að það ferli væri ekki enn hafið. Hann vildi ekki segja neitt til um það hvort einhver íslensk fyrirtæki leigðu áhafnir frá hans fyrirtæki. Flugmaður grískrar herþotu sem fór framhjá flugvélinni skömmu fyrir slysið greindi frá því að Merten hafi ekki verið í sæti sínu skömmu fyrir slysið. Hann sagðist þó hafa séð tvo menn reyna að ná stjórn á vélinni. Sérfræðingar segja loftþrýsting hafa fallið með þeim afleiðingum að flugstjórar flugvélarinnar hafi misst meðvitund. Flugvélin hafi þá í kjölfarið hrapað stjórnlaust til jarðar. Fjölmiðlar á Grikklandi hafa greint frá því að fólkið hafi frosið í hel en yfirvöld í Grikklandi segja líkin ekki hafa verið köld þegar þau fundust. Helios Airways staðfesti í yfirlýsingu sem þeir birtu á vefsíðu sinni að félagið hafi einu sinni áður orðið fyrir því að loftþrýstingur hefði fallið í flugvél þeirra. Flugfélagið staðfesti einnig að vélin sem hefði lent í því hafi verið sú sama og brotlenti á Grikklandi.