Vilja flytja inn erfðaefni í kýr

Borgfirskir kúabændur segja vísbendingar um að íslenska búkolla fullnægi ekki til frambúðar aukinni eftirspurn eftir mjólkurvörum og vilja því að hafinn verði undirbúningur að innflutningi erfðaefnis frá útlöndum. Félagar í Mjólkurbúi Borgfirðinga segja það nánast ábyrgðarleysi að hefja ekki sem fyrst undirbúning að innflutningi á erfðaefni til að blanda við íslenska kúastofninn. Þeir segja komnar fram vísbendingar um að íslenski stofninn dugi ekki til að mæta þörfum markaðarins og aukinni eftirspurn eftir mjólkurvörum. "Það eru komnar fram vísbendingar um að íslenski kúastofninn sé ekki sjálfbær, í þeim skilningi að hann geti ekki endurnýjað sig af þeim þrótti sem þörf er á núna þegar eftirspurn eftir mjólkurafurðum hefur vaxið eins og komið hefur í ljós," segir Guðmundur Þorsteinsson, bóndi á Skálpastöðum og formaður Mjólkurbús Borgfirðinga. Hann segir mikilvægt að hefja undirbúning að innflutningi fósturvísa því langur tími líði frá því innflutningur hefst þar til hægt er að nýta erfðaefnið til blöndunar við íslenskar kýr. Hann segir að þó menn hefji undirbúning innflutnings nú sé ekki þar með sagt að af erfðablöndun verði þar sem hætta megi við verkefnið hvenær sem ástæða þykir til. Miklar deilur risu fyrir þremur árum þegar sótt var um leyfi til að flytja inn erfðaefni. Þá var meirihluti kúabænda andvígur innflutningnum og Guðni Ágústsson landbúnaðarráðherra hafnaði beiðni um innflutningsleyfi. Guðmundur segir að síðan þá hafi komið í ljós að kúastofninn standi vart undir sér og að kýr endist skemur en áður. Hann telur því að afstaða margra bænda hafi breyst síðan þá þó hann vilji ekki geta sér til um hvort meirihluti sé orðinn fylgjandi innflutningi eða ekki.