R-listinn virðist í andarslitrunum

Dagar R-listans virðast taldir. Svartsýni um áframhaldandi samstarf ríkir í herbúðum þeirra þriggja flokka sem að honum standa og vilji Vinstri-grænna og Samfylkingar til samstarfs er lítill sem enginn. Vandræðagangurinn sem einkennt hefur samningaviðræður R-lista flokkanna virðist hafa leitt til þess eins að hver höndin er nú upp á móti annarri. Þegar upp úr slitnaði hjá viðræðunefndinni í gærkvöldi varð ljóst að R-listasamstarfinu gæti lokið á næstu sólarhringum þótt flokkarnir séu líklegir til að halda saman fram að kosningum næsta vor á sama tíma og þeir heyja kosningabaráttu sín á milli. Næstu skref verða ákveðin innan flokksfélaganna í næstu viku. Hemildir fréttastofu Stöðvar 2 úr röðum Vinstri - grænna herma að nánast útilokað sé að flokksfélagið í Reykjavík samþykki að ganga aftur til viðræðna um myndun R-listans. Slíkir séu brestirnir á milli Vinstri - grænna og Samfylkingarinnar. Aftur á móti segja heimildarmenn innan Samfylkingar að fulltrúar Vinstri - grænna hafi fyrir nokkrum dögum verið búnir að ákveða að slíta samstarfinu. Þeir hafi einungis fundað fram á síðustu stundu til að geta kennt Samfylkingunni um samstarfsslitin og komið þannig sterkari út úr stöðunni. Á meðan reynir Samfylkingarfólk að snúa málinu sér í hag með því að segja að enn sé von. Því megi skella skuldinni á Vinstri - græna þegar upp úr slitni. Framsókn virðist sitja á hliðarlínunni í þessari baráttu en samkvæmt heimildum fréttastofu voru framsóknarmenn tilbúnir í nánast hvað sem er til að halda samstarfinu áfram. Hvað óháða innan R-listans varðar þá hafa þeir frá fyrstu tíð haft sterka stöðu innan listans. Dagur B. Eggertsson hefur nú látið hafa eftir sér að hann muni ekki bjóða fram krafta sína í komandi kosningum nái R-listaflokkarnir ekki saman, en hann hefur lengi verið ein helsta vonarstjarna R-listans. Samfylkingarmenn virðast taka þeirri yfirlýsingu létt og segja að með þessu sé Dagur einungis að minna á sig og sína stöðu. Ingibjörg Sólrún Gísladóttir segir í Fréttablaðinu í dag að ekki sé öll nótt úti enn um R-lista samstarfið þrátt fyrir að viðræðunefndin hafi gefist upp en nánast allir sem fréttastofan hefur rætt við telja möguleikana á samstarfi nánast enga úr þessu og mjög ólíklegt, ef ekki ómögulegt, sé að flokksfélögin komist að annarri niðurstöðu. Dagar Reykjavíkurlistans virðast taldir.