Karlar drekka næstum þrefalt meira

Íslenskir karlar drekka næstum þrefalt meira áfengi en konur, þrátt fyrir að ungar konur hafi stóraukið áfengisneyslu sína síðustu ár. Þetta er meðal þess sem fram kemur í könnun á drykkjuvenjum Íslendinga, sem gerð var á vegum Lýðheilsustöðvar í lok síðasta árs, og borin var saman við könnun sem gerð var árið 2001. Mikil aukning hefur orðið á neyslu bjórs og léttvíns en Íslendingar eru orðnir bjórdrykkjuþjóð og drekkur meira af bjór en öðrum áfengum drykkjum. Þessi aukning á rót sína að rekja til fólks á aldrinum 18 til 34 ára sem hefur stóraukið neyslu sína, drekka nú rúmlega þrefalt meira en fólk á aldrinum 55 til 75 ára. Bjórdrykkjan verður ekki tíðari heldur meiri. Ungir karlar drekka nú bjór um einu sinni í viku og þá 1,8 lítra í hvert sinn. Konurnar drekka að meðaltali 1,3 lítra, fjörutíu sinnum á ári. Athygli vekur að karlar á aldrinum 55 til 75 ára hafa minnkað áfengisneysluna um tæp 20 prósent frá árinu 2001. Á sama tíma hafa ungar konur stóraukið neysluna, eða um 28 prósent. Þá eykst áfengisneysla kvenna eftir því sem þær eru meira menntaðar en dregst saman meðal karla. Þetta segja tölurnar en skýringarnar hafa menn ekki á reiðum höndum. Helgardrykkja yngra fólks er engin nýlunda hér á landi en Lýðheilsustöð segir rétt að hafa áhyggjur af aukningunni. Í ljósi umræðu um að lækka áfengiskaupaaldur og selja léttvín í matvöruverslunum telur dr Hildigunnur Ólafsdóttir, afbrotafræðingur og sérfræðingur í áfengisrannsóknum, að slíkt myndi enn auka á neysluna. Á síðustu árum hefur munur á áfengisneyslu á íbúa í einstökum löndum í Evrópu farið minnkandi. Ísland og Noregur eru þó enn þau lönd þar sem neyslan er minnst. Hildigunnur segir að þó verði að horfa til þess að Evrópubúar drekki meira áfengi en íbúar annarra heimsálfa og mikil áfengisdrykkja því evrópskt fyrirbæri.