Ástand jafnréttismála samt slæmt

Þótt Ísland sé í þriðja sæti yfir þau lönd sem best hefur gengið að tryggja jafnrétti kynjanna er ástandið þó ekkert til að hrópa húrra fyrir, að mati framkvæmdastjóra Jafnréttisstofu. Þetta kemur fram í skýrslu sem stofnunin World Economic Forum birti í gær. Í skýrslunni er reynt að leggja mat á efnahagslega og pólitíska þátttöku kvenna en einnig menntun og heilsufar í alls 58 ríkjum. Ísland kemur fast á eftir Svíþjóð og Noregi sem prýða efstu sæti listans en Danmörk og Finnland eru í fjórða og fimmta sæti. Evrópusambandsríki eru í tíu af fimmtán efstu sætunum á listanum í skýrslunni en Nýja-Sjáland er þar í sjötta sæti, Kanada í því sjöunda, Bretland er í áttunda sæti og Ástralía í því tíunda. Þá eru Bandaríkin í 17. sæti listans. Staða jafnréttismála er verst í Egyptalandi, Tyrklandi, Pakistan, Jórdaníu og Suður-Kóreu. Enn þó Ísland standi mun betur en flest lönd er víða pottur brotinn, segir Margrét María Sigurðardóttir, framkvæmdastjóri Jafnréttisstofu. Hún segir að hlutur kvenna í fjármálageiranum sé ekki til að hrópa húrra fyrir en hér á landi er aðeins 7,5% kvenna í stjórnum kauphallarfélaga eða 12 af 161. Þá eru aðeins tvær konur í forstjórastóli af 50 stærstu fyrirtækjum Íslands og aðeins tvær konur stjórnarformenn. Margrét segir þó þessi mál á réttri leið og vonast til að miklar breytingar verði á næstu árum.