Barna sé gætt á hættulegum stöðum

Herdís Storgaard, verkefnisstjóri barnaslysavarna hjá Lýðheilsustöð, brýnir fyrir foreldrum að líta aldrei af ungum börnum sínum á stöðum þar sem hættur eru augljósar. Hún segir það skelfilegt að slys hafi orðið að undanförnu þar sem legið hefur við drukknun lítilla barna. Tvö hræðileg slys hafa orðið síðustu daga, þar sem þrjú börn hafa næstum því drukknað. Fyrra slysið varð í Kolgrafarfirði þar sem tvö þriggja ára börn féllu í sjóinn og síðara slysið varð í Þingvallavatni þar sem tveggja ára barn var hætt komið. Herdís Storgaard, verkefnisstjóri barnaslysavarna hjá Lýðheilsustöð, telur að foreldrar geri sér ekki nægilega grein fyrir þeim hættum sem séu til staðar. Hún bendir á að á síðustu 20 árum hafi engin dæmi borist heilbrigðisyfirvöldum um að börn hafi drukknað eða næstum því drukknað í vötnum eða í sjó. Hún segir að það sem vekji skeflingu sé það að fólk gangi um á hættulegum stöðum með lítil börn án þess að börnin séu leidd eða að fylgst sé með þeim allan tímann. Börn á þessum aldri séu miklir óvitar og skynji alls ekki hættu, en eins og hinir fullorðnu viti hafi vatnið mikið aðdráttarafl. Herdís telur ástæðu til að brýna það fyrir foreldrum, ekki síst þar sem sumarið er nýhafið, að fara varlega þegar heitir pottar og laugar af ýmsu tagi eru annars vegar. Hún segir það nokkuð algengt nú að komið sé upp tjörnum og gosbrunnum í görðum og hún sé ekki viss um það að allir átti sig á því að börn undir fjögurra ára aldri getidrukknað í tveimur til fimm sentímetrum af vatni. Fólk þurfi að huga vel að þessu og eins þegar fólk fari í heimsókn þangað sem gosbrunnar og tjarnir eru.