Neitar að ráðast gegn fátækt

Bandaríkjastjórn neitar að taka þátt í því að ráða að niðurlögum fátæktar og lækka skuldir þriðja heims ríkja samkvæmt breskri tillögu. Bandaríkjamenn segjast vilja fara sínar eigin leiðir í þessum efnum. Gordon Brown, fjármálaráðherra Bretlands, kynnti tillögur sínar í þessum efnum á fundi fjármálaráðherra sjö helstu iðnríkja heims sem hófst í gær. Bretar fara nú með leiðtogahlutverk í þessum hópi og höfðu heitið því að koma skriði á fátæktarmálin. Ein meginhugmynd Breta er að kom á fót nokkurs konar Marshall-áætlun fyrir fátækustu lönd heims, einbeita sér að Afríku og tvöfalda þá upphæð sem fer í að aðstoða ríki álfunnar. Nelson Mandela, fyrrverandi forseti Suður-Afríku, hefur tekið þessar tillögur upp á sína arma og hvatti fjármálaráðherrana í gær til að berjast með sama krafti gegn fátækt og barist var gegn aðskilnaðarstefnunni á sínum tíma. Allt hefur komið fyrir ekki og það er svipað hér og í mörgum öðrum slíkum alþjóðlegum samstarfsverkefnum, það strandar á Bandaríkjastjórn. John Taylor, aðstoðarfjármálaráðherra Bandaríkjanna, segir hreint út að Bandaríkin hafi ekki áhuga á að taka þátt í þessari samvinnu, þessi áætlun henti þeim ekki, þeir noti sínar eigin leiðir. Þessi afstaða Bandaríkjanna olli miklum deilum á fundinum í gær og varð tilefni harkalegra orðaskipta. „Bandaríkjamenn eru á annarri bylgjulengd,“ sagði þýski fjármálaráðherrann eftir fundinn. Ekki gengur Bretum betur að afla stuðnings við hugmyndir sínar um að afskrifa alveg opinberar skuldir þeirra þriðja heims ríkja sem eru fátækust og nota til þess gullforða Alþjóðagjaldeyrissjóðsins. Bandaríkjastjórn segist fylgjandi því að minnka skuldabyrði þriðja heims ríkja en ekki á þann hátt sem Bretar leggja til. Skuldamál þriðja heimsins hafa verið á borði Vesturlanda í lengri tíma án þess að lausn finnist og á meðan Bandaríkjastjórn dregur lappirnar er ólíklegt að hún finnist. Vonir eru þó enn bundnar við að hægt verði að komast að einhverri niðurstöðu fyrir næsta fund iðnríkjanna í júlí.