Mannbjörg á Þistilfirði

Mannbjörg varð þegar nítján tonna bátur frá Raufarhöfn, Hildur ÞH, sökk á Þistilfirði um hádegi í dag. Tveir menn voru um borð í bátnum en þeim var bjargað af áhöfn Gunnbjargar, björgunarskipi björgunarsveitarinnar Pólstjörnunnar á Raufarhöfn. Björgunarskipið var kallað út um klukkan 12.50 eftir að leki hafði komið að Hildi en um 40 mínútur tók að komast að bátnum. Einnig var kallað á þyrlu Landhelgisgæslunnar. Mennirnir tveir höfðu strax komist í gúmbjörgunarbát og voru, að sögn skipstjórans á Gunnbjörgu, ekki í hættu. Gunnbjörg kom með mennina til Raufarhafnar rétt fyrir klukkan þrjú. Hildur, sem var á línuveiðum þegar óhappið varð, var nýverið keyptur til Raufarhafnar.