McLaren sagði nei við Schumacher

Ron Dennis, yfirmaður McLaren-liðsins í Formúlu 1 kappakstrinum, viðurkenndi á dögunum að liðið hefði neitað Michael Schumacher um samning áður en hann gekk til liðs við Ferrari og hóf hina mikla sigurgöngu sem hefur einkennt Formúluna undanfarin ár. "Við höfðum tækifæri til að fá Michael í okkar raðir en afþökkuðum það," sagði Dennis. "Á þeim tíma fannst okkur þetta vera rétt ákvörðun, ég var hluti af því og sé ekkert eftir því. Í dag erum við heppnir að vera með tvo af fimm bestu ökumönnum heims," bætti Dennis við og átti þar við Finnann Kimi Räikkönen og Kólumbíumanninn Juan Pablo Montoya.