Fleiri vilja leiða sjálfstæðismenn

Útlit er fyrir að framboð Gísla Marteins Baldurssonar til efsta sætis á lista sjálfstæðismanna í Reykjavík verði til þess að fleiri sækist eftir því að leiða listann. Guðlaugur Þór Þórðarson verður þó ekki einn þeirra því flest bendir til að hann ætli að hætta sem borgarfulltrúi. Eftir tilkynningu Gísla Marteins í gær er ekki lengur möguleiki á að flokksmenn standi einhuga að baki núverandi oddvita, Vilhjálmi Vilhjálmssyni. Með framboði sínu hefur Gísli þannig opnað dyrnar að framboði til fyrsta sætisins fyrir fleiri frambjóðendur. Samkvæmt öruggum heimildum fréttastofu Stöðvar 2 eru miklar líkur á að minnst einn í viðbót muni berjast um efsta sætið og jafnvel fleiri. Guðlaugur Þór Þórðarson verður þó ekki einn þeirra því allt útlit er fyrir að hann ætli að hætta í borgarmálum eftir þetta kjörtímabil. Heimildarmenn fréttastofu innan Sjálfstæðisflokksins segjast allir telja að Guðlaugur sé að hætta enda ætli hann að einbeita sér að störfum sínum á Alþingi. Guðlaugur segist þó sjálfur ekki hafa tekið ákvörðun um að hætta sem borgarfulltrúi eftir kjörtímabilið Samkvæmt skoðanakönnun Fréttablaðsins, sem birtist í morgun næðu sjálfstæðismenn hreinum meirihluta ef kosið yrði í borginni nú. Af þeim sem tóku afstöðu í könnun Fréttablaðsins, sögðust 53,5 prósent kjósa Sjálfstæðisflokkinn. Vilhjálmur Þ. Vilhjálmsson, oddviti sjálfstæðismanna í borgarstjórn, segir líta á niðurstöðuna sem skýra traustsyfirlýsingu við sig. Hann hafi verið oddviti og verkstjóri hópsins í rúm tvö ár. Hann spyr sig hvort honum yrði ekki kennt um það ef flokkurinn bætti ekki við sig fylgi heldur væri í 40 prósentum eins og í síðustu kosningum. Aðspurður hvort honum þyki þá ekki súrt í broti að það sé ekki einhugur innan Sjálfstæðisflokksins í Reykjavík um að fylkja sér á bak við hann segir Vilhjálmur að hann hafi ekki verið kosinn í fyrsta sæti nú heldur hafi hann tekið við af Birni Bjarnasyni. Það sé því ósköp eðlilegt ef einhver annar haldi að hann geti gert betur en hann og sótt meira fylgi en 53-54 prósent og eins gott að það komi þá fram.