Ásgeir valdi atvinnulífið

Ásgeir Friðgeirsson segir af sér varaþingmennsku fyrir Samfylkinguna. Hann kýs heldur að starfa í framvarðasveit íslenskra fyrirtækja á alþjóðavettvangi. Ásgeir Friðgeirsson hefur verið varaþingmaður Samfylkingarinnar síðan 2003. Síðan þá hefur hann einnig starfað sem sjálfstæður ráðgjafi fyrirtækja og fjárfesta, meðal annars fyrir Björgólfsfeðga. Ásgeir segir að á síðustu tveimur árum hafi viðskiptavinir hans stóraukið umsvif sín á alþjóðavettvangi og hafi hann fylgt þeim eftir í framrásinni ytra. Guðmundur Árni Stefánsson hættir þingmennsku um næstu mánaðamót þegar hann gerist sendiherra í Stokkhólmi. Með réttu ætti Ásgeir því að verða fjórði þingmaður Samfylkingarinnar í Suðvesturkjördæmi en hann hefur gefið eftir þingsæti sitt. Hann segir það ekki fyllilega heiðarlegt gagnvart kjósendum að halda áfram þingsetu á meðan hann gegni öðru starfi. Ásgeir neitar þó að þau rök gildi um varaþingmennskuna. „Þegar ég var varaþingmaður var ég kallaður inn til tímabundinna starfa og það er hefð fyrir því á Íslandi að þeir sem eru kallaðir til losi sig ekki undan öllum þeim störfum eða þeim skyldum sem þeir annars hefðu. Það að vera varamaður utan þings er ekki launað starf,“ segir Ásgeir. Í sífellt auknum mæli hafna menn þingsæti fyrir önnur störf. Það má velta því fyrir sér hvort starfið þyki einfaldlega ekki nógu spennandi og launin ef til vill of lág? Ásgeir segir launin á Alþingi góð miðað við laun almennt. Laun hins opinbera hafi hins vegar á síðustu árum gefið eftir í samanburði við laun á almennum vinnumarkaði. Ásgeir þvertekur þó fyrir að laun hafi nokkuð með ákvörðun hans að gera. Þá segist hann ekki hafa fengið leið á þingmennsku. Hann hafi valið það starf sem hann teldi sig betur í stakk búinn til að sinna vel. Valdimar L. Friðriksson tekur við sæti Guðmundar í haust en hann starfar sem framkæmdastjóri ungmennafélagsins Aftureldingar í Mosfellsbæ. Hann sat meðal annars á þingi í forföllum Katrínar Júlíusdóttur.